Аллоh бандаларига Пайғамбарларни раҳмат этиб юборди ва уларни етказган хабарларида содиқ эканлигини исботи сифатида мўъжизалар ато этди. Пайғамбаримиз Муҳаммад ﷺга энг кўп мўъжизалар берилди. Улардан бири бу тундагиал Исро ва Меърож сайридир.
Ал-Исро мўъжизасига далил Қуръони каримнинг ал-Исро сурасининг биринчи оятидир:
سُبْحَانَ الَّذِي أَسْرَى بِعَبْدِهِ لَيْلًا مِنَ الْمَسْجِدِ الْحَرَامِ إِلَى الْمَسْجِدِ الْأَقْصَى الَّذِي بَارَكْنَا حَوْلَهُ لِنُرِيَهُ مِنْ آيَاتِنَا إِنَّهُ هُوَ السَّمِيعُ الْبَصِيرُ
Маъноси: "Ўз бандаси Муҳаммад алайҳиссаломга Масжидул-Ҳаромдан атрофлари баракали қилинган Масжидул-Ақсога Аллоhнинг қудрати қанчалик буюк эканлигини кўрсатиш учун турли ғаройиб мўъжизаларни кўрсатиб тунда сайр қилдирган Аллоҳ айб-у нуқсондан покдир. Албатта, У эшитувчи ва кўрувчидир."
Ундан ташқари саҳиҳ ҳадисда ҳам ушбу мўъжиза ҳақ эканлиги тасдиқланди ва Ислом олимларининг бу масалада иттифоқлари ҳам бор. Расулуллоh ﷺ бу тунда Макка шаҳридаги масжидул-Ҳаромдан Фаластиндаги масжидул-Ақсога ҳам жисмонан ҳам руҳан саёҳат қилганлар яъни бу ҳодиса тушларида рўй бермаган. Шунингдек уламолар ким бу масалани инкор қилса Қуръони каримнинг оятини инкор қилгани учун куфр содир қилган ҳисобланади дедилар.
Расулуллоh ﷺ Макка шаҳридаги Абу Толибнинг қизлари умму Ҳонийнинг уйларида эдилар. Ал-Исро мўъжизаси шу ердан бошланади. Уйнинг томи очилиб Жаброил عليه السلام тушиб келади. Жаброил عليه السلام Расулуллоh ﷺнинг кўксини ёриб, очилган жойни зам зам суви билан ювдилар ва ҳикмат ҳамда иймон билан тўлдирилган идишни келтириб кўксларига тўлдирдилар. Жаброил عليه السلام бу билан Расулуллоh ﷺни Аллоhнинг қудрати қанчалик буюк эканлигини кўрсатиш учун турли ғаройиб мўъжизаларни кўришга тайёрлаган эдилар.
Расулуллоh ﷺ хуфтон намозини адо этганларидан сўнг, Жаннатдан келтирилган Буроқ исмли оқ ҳайвонда саёҳатларини бошладилар.
Буроқ шу қадар тез эди-ки, кўзи билан кўрган энг узоқ масофага бир лаҳзада етар эди.
Пальма дарахтлар ўсган ерга етиб келганларида Жаброилعليه السلام Расулуллоh ﷺга Буроқдан тушиб намоз ўқишларини айтади. Расулуллоh ﷺ икки ракат намоз адо этганларидан сўнг Жаброил عليه السلام “Қаерда намоз ўқиганингизни биласизми?”-деб сўрайди. Расулуллоh ﷺ уларга жавобан “Аллоh барча нарсани билгувчидир” деб айтадилар. Жаброил “Бу жой Ясриб (Тайбаҳ) деб жавоб берадилар. Бу ном Мадина шаҳрининг олдинги номи эди.
Буроқ йўлда яна давом этди ва маълум бир ерга етганларида Жаброил عليه السلام Расулуллоh ﷺга яна тушиб намоз ўқишларини айтадилар. Бу жойнинг номини Жаброил Тур Сина эканлигини хабар қиладилар.
Улар яна йўлда давом этиб, такрор бир ерга етиб келганликларида Расулуллоh ﷺ икки ракат намоз адо этадилар. Бу манзил эса Исо عليه السلام дунёга келган жой Байт Лаҳм эди. Буроқ яна Фаластинга етгунга қадар йўлда давом этди.
Расулуллоh ﷺ уловлари Буроқни масжидул-Ақсо ташқарисидаги бир ҳалқага боғладилар. Бу ҳалқага фақат Пайғамбарлар уловларини боғлар эди. Расулуллоh ﷺ масжидга кирганларидан сўнг, Аллоh барча Одам عليه السلامдан то Исоعليه السلام гача бўлган Пайғамбарларни масжидул-Ақсога жамланишларини ирода қилган. Расулуллоh ﷺ имом этиб тайинланиб намозда барча Пайғамбарларга бошчилик қилганлар. Бу эса уларнинг юксак даражаларини ва энг афзал эканликларини ифодалайди.